Nazirlik bu ölkənin avtomobillərinin idxalına və satışına QADAĞA QOYDU

ABŞ Ticarət Nazirliyi Rusiya və ya Çin texnologiyalarından istifadə edilərək istehsal edilmiş internet bağlantılı minik avtomobillərinin idxalını və satışını qadağan edib.

Avtosfer.az “Report”a istinadən xəbər verir ki, bu barədə Ağ evin mətbuat xidməti məlumat yayıb.

“Ticarət Nazirliyi ÇXR və Rusiyadan internetə qoşulan avtomobillər üçün aparat və proqram sistemlərinin, həmçinin internetə qoşulan hazır nəqliyyat vasitələrinin satışı və idxalını yasaqlayan yekun qərar dərc edib”, – bəyanatda deyilib.

Qeyd edək ki, Vaşinqton qadağanı ABŞ-də “avtomobil təchizat zəncirini” “kiber təhdidlərdən” qorumaq məqsədilə tətbiq edir. Qərar xüsusilə 2027-ci il model sıralarından başlayaraq “Bluetooth” və “WiFi” modullarına, peyk və mobil rabitəyə qoşulma texnologiyalarına və avtomatlaşdırılmış sürücülük sistemlərinə şamil edilir. Məhdudlaşdırıcı tədbirlərə həmçinin Rusiya və ya Çin iştirakı olan şirkətlər tərəfindən ölkədə istehsal edilmiş avtomobillərin Birləşmiş Ştatlar ərazisində satışının qadağan edilməsi də daxildir.