Yuxulu sürücülərlə bağlı AĞIR STATİSTİKA

Bu araşdırma başqa bir ölkədə aparılıb. Lakin məsələnin bizə toxunan tərəfləri olduğu üçün xəbəri yaymaq qərarına gəldik.  

Avtosfer.az xəbər verir ki, Belçikanın Valoniya regionunda aparılmış araşdırmada məlum olub ki, sürücülərin 46 faizi ötən ay çox yorğun və ya yuxulu halda avtomobil idarə edib. Bu statistika həm sürücülərin, həm də digər yol hərəkəti iştirakçılarının hansı təhlükə altında olduğunu göstərir.
Yuxusuzluğun səbəbi gündəlik həyat tərzi və rejimsizlikdir. Avropanın yol hərəkəti ekspertləri hesab edirlər ki, yuxulu sürücü alkoqol qəbul etmiş sürücüdən daha təhlükəlidir. Sükan arxasında mürgüləyən sürücünün çox vaxt ətraf aləmlə kontaktı kəsilir, hadisələrə adekvat reaksiya verə bilmir. 

Qonşu Rusiyada vəziyyət daha dəhşətlidir. Daxili işlər nazirinin müavini Aleksandr Qorovoy bildirib ki, federasiyada yol qəzası zamanı ölümlərin 60%-i üzbəüz toqquşmalar dır. Bunun başlıca səbəbi nə qədər təəccüblü olsa da, alkoqolizm deyil, sürücülərin uzaq yolda sükan arxasında yuxulamasıdır. 

Avropalı mütəxəssislər çıxış yolunu adi qaydada görürlər: yorğunluq hiss edən kimi nəqliyyat vasitəsini dayandırıb istirahət etmək, ən geci 2 saatda bir dəfə 15 dəqiqə istirahət etmək. Ən əsası, uzaq yola çıxmazdan əvvəl yaxşı yatmaq.  

Təəssüf ki, Azərbaycanda da sükan arxasında yatan sürücülərin törətdiyi ağır qəzalara rast gəlirik.

Vüqar