Azərbaycan tarixində rekord: İlk dəfə 5 milyona yaxın seçici səs verdi - QRAFİK

Fevralın 7-də Azərbaycanda növbədənkənar prezident seçkiləri keçirilib. Seçkilərdə hakim partiyanın namizədi Prezident İlham Əliyev 92%-dən çox səs toplayaraq qələbə qazanıb.

Azərbaycanın müstəqilliyini əldə etdiyi tarixdən bu yana keçirilən sayca 8-ci seçkidə seçici fəallığı 76.73% olub. Beləliklə, seçicilərin 4 milyon 971 min 32 nəfəri öz səsvermə hüququndan istifadə edib.

Ötən gün keçirilən seçkilərdə ən yuxarı seçici fəallığı 15 saylı Yasamal birinci seçki dairəsində (83.36%) ən aşağı isə 19 saylı Nərimanov birinci seçki dairəsində qeydə alınıb (59.8%).

Modern.az mövzunun aktuallığını nəzərə alaraq indiyədək keçirilən prezident seçkilərində seçici fəallığının necə dəyişdiyini araşdırıb.

Müstəqilliyin əldə edilməsindən sonra Azərbaycanda ilk prezident seçkiləri 1992-ci ildə keçirilib. Bu seçkidə seçici siyahılarına daxil edilmiş şəxslərin ümumi sayınm 76,3 faizi səsvermədə iştirak edib. Yəni 3 099 480 nəfər seçici öz səsvermə hüququndan istifadə edib.

1993-cü ildə keçirilən növbəti seçkidə seçici fəallığı 97.60 % olub. 3 967 628 seçici səsvermədə iştirak edib.

5 il sonra oktyabrın 11-də keçirilən Prezident seçkiləri günü səsvermədə 3.358.465 seçici iştirak edib ki, bu da seçici siyahılarında seçicilərin ümumi sayının 79, 18 faizini təşkil edirdi.

2003-cü ildə keçirilən prezident seçkilərində isə seçici aktivliyi 62.85 % olub. Bu seçkidə seçicilərin 2,791,997 nəfəri iştirak edib.

2008-ci ildə keçirilən prezident seçkilərində səsvermə hüququna malik olan vətəndaşların 75,12%-i (3 701 690 vətəndaş) iştirak edib. 2013-cü il seçkilərində isə 3 735 374 nəfər səs verib. Seçici aktivliyi 71.63% olub.

Sonuncu – 2018-ci il seçkilərində isə 3 962 123 seçici səsvermə hüququndan istifadə edib. Seçkilərdə 74.3%  seçici fəallığı qeydə alınıb.

Beləliklə, fevralın 7-də keçirilən və ilk dəfə bütün Azərbaycan ərazisində baş tutan səsvermə ən çox seçicinin iştirak etdiyi prezident seçkiləri olub. Belə ki, Azərbaycan tarixində rekord səviyyədə - ilk dəfə 5 milyona yaxın seçici səsvermə hüququndan istifadə edib.