Bakıdan kənar universitet şəhərcikləri salınacaq - AÇIQLAMA

"Ali təhsil müəssisələri paytaxtdan kənar ərazilərə köçürülməlidir". Avtosfer.az xəbər verir ki, bu sözləri Milli Məclisin deputatı Vüqar İskəndərov parlamentin noyabrın 14-də keçirilən plenar iclasında “Azərbaycan Respublikasının 2024-cü il dövlət büdcəsi haqqında” qanun layihəsinin müzakirəsi zamanı deyib. Onun sözlərinə görə, şəhərin mərkəzində tıxac əsas problemdir: "Əsas səbəb də mərkəzdə universitet sayının çoxluğu və dövlət obyektlərinin paytaxtda yerləşməsidir. Gələn ilin büdcəsində həmin universitetlərin şəhər kənarına köçürülməsinə baxmalıyıq”. Deputat, həmçinin bildirib ki, gələn ilin sentyabrından avtomobillərin utilizasiyası məsələsinin həllini tapması gözlənilir: "Çünki ölkəmizdəki avtomobillərin 80 %-nin istismar müddəti bitib. Bu, kütləvi məsələ olduğundan ədalətli həll üçün mexanizm yaradılmalıdır".

Dövlət Şəhərsalma və Arxitektura Komitəsinin mətbuat katibi Ramiz İdrisoğlu Avtosfer.az-a müsahibəsində, Bakı şəhərinin baş planında universitet şəhərciklərinin nəzərdə tutulduğunu bildirdi. “Təhsilin inkişafı konsepsiyası çərçivəsində və ona uyğunlaşmaqla məsələnin ölkə miqyasında kompleks həllinə baxıla bilər. Hazırda Bakı şəhərinin Baş plan layihəsi təsdiq edilmə mərhələsindədir.”

Nurlan Sakitoğlu