Bütün ölkə kart sisteminə keçir - Prezident tapşırıq verdi

“Biz nağd pul dövriyyəsi sferasını azaltmalıyıq. Nağdsız ödəmələr genişləndirilməlidir”. Bunu Azərbaycan Respublikasının Prezidenti İlham Əliyev Nazirlər Kabinetinin 2015-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında deyib. Nağdsız ödəmələrin genişləndirilməsi hansı məqsəd daşıyır? “Nağdsız pul sisteminə keçid, pul hərəkətinə nəzarətin gücləndirilməsi üçün nəzərdə tutulur”. Avtosfer.az xəbər verir ki, bu barədə atv.az–a açıqlamasında İqtisadi Resursların Öyrənilməsi Mərkəzinin sədri, iqtisadçı Ruslan Atakişiyev bildirib. Onun sözlərinə görə,  Azərbaycanda nağdsız hesablaşmaların genişləndirilməsi istiqamətində işlər son 6-7 ildə daha çox sürətlənib: “İnkişaf etmiş ölkələrə baxsaq, orada nağdsız hesablaşmalar ümumi hesablaşmaların 80%-ini təşkil edir. Azərbaycanda isə bu proses əksinədir. Ölkədə nağdsız ödənişlər müxtəlif əmək haqları, pensiya və kredit kartları vasitəsilə həyata keçirlir. Amma buna baxmayaraq, vəziyyət hələ də qənaətbəxş deyil. Nağdsız hesablaşma işlərində maarifləndirmə işlərinin keçirilməsinə ehtiyac var. Çünki əhali bunun əhəmiyyətini bilməlidir”.

İqtisadçı həmçinin bildirdi ki, nağdsız pul sisteminə keçilməsi kağız pul kütləsinin dövriyyədə azalması üçün sərfəlidir: “Elektron puldan istifadə həm pul dövriyyəsində şəffavlığın artmasına gətirib çıxaracaq”.