Dövlət qurumu dağıtdığı yolu düzəltməyi "unutdu" - Sürücülər əziyyət çəkir - FOTO

Yolların qazılmasından sonra bərpa işlərinin operativ şəkildə görülmədiyi və ya “unudulduğu” tez-tez müşahidə edilir. Bu da sürücülər üçün çətinlik yaradır. Qazıntı aparılarkən ayrılan xərclərdə bərpa işləri də nəzərdə tutulur. Lakin yollar bərpa olunmur .

Avtosfer.az xəbər verir ki, analoji hal Nizami rayonunun Tofiq Abbasov küçəsində də baş verib.

Belə ki, qazıntı işlərindən sonra asfalt yol bərpa edilməyib. Bu da nəqliyyat vasitələrinin rahat hərəkətinə mane olur. Qazıntını “Azərsu” ASC-nin apardığı və yolun bir həftədən çoxdur bu vəziyyətdə qaldığı deyilir.

Qeyd edək ki, İnzibati Xətalar Məcəlləsinin 354-cü maddəsinə görə, avtomobil yollarında yol hərəkətinin təhlükəsizliyinin təmin edilməsi qaydalarının pozulmasına görə fiziki şəxslər səksən manatdan yüz manatadək məbləğdə, vəzifəli şəxslər dörd yüz manatdan beş yüz manatadək məbləğdə, hüquqi şəxslər üç min manatdan dörd min manatadək məbləğdə cərimə edilir.

Məsələ ilə bağlı Avtosfer.az-a açıqlama verən “Azərsu” ASC-nin ictimaiyyətlə əlaqələr şöbəsinin müdiri Anar Cəbrayıllı bildirilib ki, qurum hər hansı bir ərazidə qazıntı işi aparıb, qəzanı aradan qaldırırsa və ya su xətti çəkirsə yolun asfaltlanması işlərini yol idarələri həyata keçirir: ““Azərsu” ASC ilə yol idarələri arasında müqavilə imzalanıb. Həmin müqaviləyə əsasən yol idarələri yolda asfalt örtüyünü bərpa edirlər. Sözügedən ərazidə də yol qazılıb, su xətində bərpa işləri aparılıb, əks dolğu vurulub. Asfalt isə yol idarələri tərəfindən bərpa edilməlidir”.

Məhəbbət Tərlanoğlu