Paytaxtın təhlükə mənbəyinə çevrilən zibil qabları - FOTO

Paytaxtın müxtəlif ərazilərində dayanma-durma qaydalarını pozan sürücülərə tez-tez rast gəlirik. Avtomobillər üçün nəzərdə tutulmayan yerlərdə xüsusilə piyada səkilərində, keçidlərdə, parklarda maşınını saxlayan şəxlərin sayı, təəssüf ki, durmadan artır. Yaranmış vəziyyət qanuna zidd olmaqla yanaşı insanların işini çətinləşdirir, bəzən qəza təhlükəsi belə yaradır. 
Son günlərdə məişət tullantıları üçün ayrılmış yerlərin önündə avtomobillərin park edilməsiylə bağlı şikayətlər çoxalıb. Məsələylə bağlı izləyicilərimiz Avtosfer.az-a fotoşəkillər göndərib. Bildiriblər ki, bəzi sürücülər avtomobillərini zibil konteynerlərinin qarşısında saxlayaraq həm sakinlərə, həm də təmizlik işçilərinə maneə törədirlər. Elə fotoşəkildən  də göründüyü kimi, “Khazar” markalı avtomobillər zibil qablarının önünü kəsərək ard-arda parklanıb. Nəticədə yaranmış hal insanların zibil atmasına, konteynerlərin təmizlənməsinə əngəl yaradır. Vəziyyətdən çıxış yolu kimi isə təmizlik işçiləri və ya vətəndaşlar küçələrdə zibil qabını qoyulduğu hissədən önə - yola çıxarılır. Bu isə xoşagəlməz mənzərə yaratmaqla yanaşı həm də ciddi təhlükə mənbəyidir. Xüsusilə gecə saatlarında zolaqla hərəkətdə olan avtomobilin sürücüsü zibil qabını görməyə bilər və nəticədə qəza yaranar.

Nərmin