Qlobal mənzil böhranı forumun əsas müzakirə obyektidir – Keniyalı turist - FOTO

Ümumdünya Şəhərsalma Forumunun 13-cü sessiyası qlobal mənzil böhranının həlli üçün iştirakçılar tərəfindən mühüm platforma kimi dəyərləndirilib. 

“World Urban Forum” çərçivəsində çıxış edən Keniyadan gələn qonaq Diana Angela forumun beynəlxalq səviyyədə müxtəlif fikirləri və təcrübələri bir araya gətirən unikal platforma olduğunu bildirib.

Diana Angela Avtosfer.az-a müsahibəsində qeyd edib ki, hazırda dünya üzrə bir çox ölkələri narahat edən əsas problemlərdən biri olan mənzil böhranının həlli istiqamətində bu cür beynəlxalq müzakirələrin aparılması xüsusi əhəmiyyət daşıyır. Onun sözlərinə görə, müxtəlif ölkələrin nümayəndələrinin bir araya gələrək təcrübə mübadiləsi aparması ortaq həll yollarının tapılmasına imkan yaradır.

O, ümumilikdə forumu çox məhsuldar və faydalı bir müzakirə mühiti kimi dəyərləndirib. Diana Angela həmçinin vurğulayıb ki, burada aparılan dialoqlar təkcə tədbir müddəti ilə məhdudlaşmamalı, Dünya Şəhərsalma Forumu başa çatdıqdan sonra da davam etməlidir.

Qonaq əlavə edib ki, bu cür platformalar gələcək əməkdaşlıqlar üçün mühüm zəmin yaradır və şəhərsalma sahəsində qlobal çağırışlara daha effektiv cavab vermək baxımından böyük önəm daşıyır.

Eltac Zülfüqaroğlu