Sahil parkı ərazisindəki velosiped zolağı ilə bağlı AÇIQLAMA

Sahil parkının ərazisində mövcud velosiped zolağı 2022-ci ildə təşkil edilib. Zolağın parkda salınması ilə bağlı vətəndaşlardan çoxsaylı şikayətlər daxil olurdu. Bununla bağlı Avtosfer.az-a Azərbaycan Yerüstü Nəqliyyat Agentliyindən məlumat verilib. Bildirilib ki, AYNA tərəfindən beynəlxalq məsləhətçi şirkət cəlb olunmaqla Bakı şəhərində velosiped yollarının yeni şəbəkəsinin layihəsi hazırlanıb. Bu ilin əvvəlindən etibarən layihənin icrasına başlanılıb. Daha əvvəl təşkil edilən  infrastrukturun bəzi hissələri də yeni şəbəkəyə daxil edilib. Səkilərin üzərində salınan və layihəyə daxil olmayan ərazilərdəki velosiped zolaqlarının ləğv edilməsi və səkilərin bərpası nəzərdə tutulur.   

Velosiped zolaqları layihəsinin ilkin mərhələsi Bakı şəhərinin əsasən mərkəzi hissələrini - İstiqlaliyyət küçəsi, Azərbaycan prospekti, Mirzəağa Əliyev küçəsi, Bülbül prospekti, Fikrət Əmirov küçəsi və Bulvar ərazisini əhatə edir. Mərhələli şəkildə digər küçələrdə də bu tip velosiped zolaqlarının salınması planlaşdırılır.