AAYDA-nın 5 əməkdaşı göbələkdən zəhərləndi - ADLAR - YENİLƏNİB

Qobustan rayonunda göbələkdən zəhərlənən şəxslərin son durumu açıqlanıb.

Avtosfer.az xəbər verir ki, bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.

Bildirilib ki, noyabrın 5-də saat 14:00-da beş nəfər (kişi) zəhərlənmə şübhəsilə Qobustan Rayon Mərkəzi Xəstəxanasının Təcili tibbi yardım şöbəsinə hospitalizasiya olunub:

"Onların hər birinə zəruri tibb xidmət göstərilib. Vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar".

***09:11

Qobustan rayonunda beş nəfər göbələkdən zəhərlənmə şübhəsi ilə xəstəxanaya yerləşdirilib.

Avtosfer.az oxu.az-a istinadən xəbər verir ki, zəhərlənən şəxslər rayon sakinləri Miryaqub Bayramov, Zaur İlyasov, Etibar Bağıyev, Səfərxan Baloğlanov və Ağa Ağayevdir.

Onların Qobustan Rayon Mərkəzi Xəstəxanasına çatdırıldığı bildirilir.

İlkin məlumata görə, zəhərlənən şəxslər Azərbaycan Avtomobil Yolları Dövlət Agentliyinin (AAYDA) Regional Yol İstismarı İdarəsinin əməkdaşlarıdır.

Ehtimal olunur ki, onlar işlədikləri ərazidə yol kənarından topladıqları göbələkləri yeyiblər.

Faktla bağlı araşdırma aparılır.