Ağdamda valideynləri tərəfindən döyülən uşaq süni tənəffüs dəstəyi aparatından ayrıldı

Ağdamda valideynləri tərəfindən zorakılığa məruz qalan azyaşlı süni tənəffüs dəstəyi aparatından ayrılıb.

Avtosfer.az xəbər verir ki, bu barədə oxu.az-ın sorğusuna cavab olaraq Tibbi Ərazi Bölmələrini İdarəetmə Birliyindən məlumat verilib.

Bildirilib ki, 2023-cü il təvəllüdlü azyaşlının (kişi cinsli) müalicəsi Respublika Neyrocərrahiyyə Xəstəxanasının Anesteziologiya, reanimasiya və intensiv terapiya şöbəsində davam etdirilir:

"Müştərək travma, qapalı kəllə-beyin travması, sol beyin yarımkürəsinin üzərində kəskin subdural hematoma, bədənin çoxsaylı əzilmış yaraları diaqnozları təyin edilən pasiyentin üzərində subdural hematomanın boşaldılması, dekompressiv kraniotomiya əməliyyatı icra olunub.

Hazırda süni tənəffüs dəstəyi aparatından ayrılıb, vəziyyəti ağır qiymətləndirilir".

Xatırladaq ki, 2023-cü il təvəllüdlü azyaşlı avqustun 27-si saat 16:20-da komatoz vəziyyətdə Ağdam Rayon Mərkəzi Xəstəxanasının Təcili tibbi yardım şöbəsinə hospitalizasiya olunub. Zəruri tibbi xidmət göstərilən azyaşlı daha ixtisaslı tibbi xidmət almaq üçün Respublika Neyrocərrahiyyə Xəstəxanasına təxliyə edilib.