Asfalta çırpılan sərnişin: Təqsirkar kimdir?

Füzulidə baş vermiş qəza hamıya məlumdur. “Jiquli” ilə “Toyota”nın toqquşması zamanı sərnişin alın şüşəsindən çıxaraq yola çırpılıb.
Ənənəvi olaraq qəzadan dərhal sonra sosial şəbəkədə məsələ ilə bağlı standart müzakirələr və standart şərhlərə rast gəlirik: sovet maşınları təhlükəlidir, başqa maşın olsa belə olmazdı və s.
Bəli, bu şərhlər doğru olsa da, primitivdir. Məsələni belə qoyaq: tutaq ki, “Jiquli”nin deyil, “Toyota”nın sərnişini bu situasiyaya düşsə necə olardı? 
Cavab sadədir: “Toyota”nın alın şüşəsi kuzova çox kip bərkidildiyi üçün sərnişin alın şüşəsinə çırpılaraq ciddi, bəlkə də ölümcül kəllə-beyin travması alacaqdı. Lakin o, bayıra atılaraq digər nəqliyyat vasitəsinin altına düşmək və ya dibi görünməyən dərəyə yuvarlanmaq riski ilə qarşı-qarşıya qalmayacaqdı. Bununla belə, qəza xəsarətsiz də ötüşməyəcəkdi. 
Hadisə yerindən çəkilən fotolar sübut edir ki, sərnişinin asfalta çırpılmasında təqsirkar ilk növbədə özüdür. Əgər o, təhlükəsizlik kəmərindən istifadə etsəydi, qəzadan yüngül zədə ilə qurtula bilərdi.  
Bu hadisə bir daha göstərir ki, təhlükəsizlik kəməri təkcə sürücü deyil, həm də sərnişinlər üçündür. Sürücülərin çoxu cərimə qorxusundan kəmər taxır. Sərnişinlərin kəmnər taxması qanunun tələbi olsa da, təəssüf ki buna az adam əməl edir. Nəticə də Füzulidəki kimi olur.

Vüqar Yaşaroğlu