Avtobus sürücüsü zolaqdan çıxıb yarış keçirdi; qəza təhlükəsi yaratdı - VİDEO

Bakının Sabunçu rayonu ərazisində 197 nömrəli marşrut xətti ilə hərəkət edən avtobus xüsusi ayrılmış zolaqdan çıxaraq təhlükəli ötmə edib. Avtosfer.az xəbər verir ki, hadisə sürücülərdən birinin avtomobilinin təhlükəsizlik kameraları tərəfindən qeydə alınıb. Avtobus sürücüsü qarşıdakı avtobusu ötmək üçün öz zolağından çıxıb və minik avtomobilinin üstünə sürüb. Nəticədə minik avtomobilinin sürücüsü qəzadan yayınmaq üçün qarşı yola çıxmalı olub.

Məsələ ilə bağlı AYNA-dan oxu.az-a bildirilib ki, manevretmə, geridönmə və müxtəlif maneələrlə rastlaşdığı təqdirdə avtobuslar onlar üçün ayrılmış zolaqdan kənara çıxmaq məcburiyyətində qalırlar:

"Bu kimi hallar olmadığı təqdirdə avtobuslar təşkil edilmiş zolaqla hərəkət etməlidirlər. Bununla bağlı daşıyıcılarla iş aparılır. Onlara sürücülərin sərnişindaşıma və yol hərəkəti qaydalarına riayət etmələri ilə bağlı maarifləndirici söhbətlərin aparılması tapşırığı verilir".

Bakı Şəhər Dövlət Yol Polisi İdarəsinin baş inspektoru Rüstəm Əhmədli isə qeyd edib ki, videogörüntü ilə bağlı hazırda araşdırma aparılır.

"Avtobus sürücüsü müəyyən olunaraq, barəsində qanunvericiliyə uyğun tədbir görüləcək".