Bakıda 10 min manatlıq “təqaüd dələduzluğu”

"Təqaüd dələduzluğu” ilə bağlı daha bir cinayət işinin məhkəmə istintaqı başa çatıb.

Avtosfer.az "Qaynarinfo"ya istinadən xəbər verir ki, dələduzluq hadisəsi Binəqədi rayonunda baş verib.

Bəxtiyar adlı şəxs Tural Qasımlı adlı şəxsin hərbi xidmətdə ayağından zədə alan oğluna təqaüd düzəldəcəyini, həmçinin zədələndiyinə görə 12 000 manat kompensasiya alacağını vəd edərək bunun müqabilində ondan 15 000 manat istəyib.

Tərəflər 10 000 manata razılaşıb. Tural Qasımlı əvvəlcə Bəxtiyara 5 500 manat, daha sonra 500, bir neçə gün sonra isə 4000 manat verib.

Bəxtiyar pulu alsa da, vədini yerinə yetirməyib. Qarşı tərəf polisə şikayət edib. Bəxtiyar saxlanılıb və ona Cinayət Məcəlləsinin 178.2.4-cü maddəsi ilə ittiham elan edilib. Həmçinin onun barəsində məhkəmənin qərarı ilə həbs qətimkan tədbiri seçilib.

Cinayət işinin məhkəmə istintaqı Binəqədi Rayon Məhkəməsində hakim Rəşid Rzayevin sədrliyi aparılıb.

Bəxtiyar verilmiş ittiham üzrə təqsirli bilinərək 3 il müddətinə azadlıqdan məhrum edilib.

Onun şübhəli şəxs qismində saxlanıldığı 2 gün verilən cəzadan çıxılıb və üzərində qəti olaraq 2 il 11 ay 28 gün müddətinə azadlıqdan məhrumetmə cəzası saxlanılıb.