"BazarStore” vətəndaşları aldadır; əsl qiyməti endirimli qiymət kimi təqdim edir – İDDİA - VİDEO

Sosial şəbəkələrdə yayılan görüntülər cəmiyyətdə böyük rezonans doğurub. Görüntülərdə ölkədəki iri supermarketlərdən birindəki endirim kampaniyalarının əslində vətəndaşları manipulysiya edən vasitəsi olduğu aydın şəkildə bilinir.

Avtosfer.az xəbər verir ki, vətəndaşların iddiasına görə, bir çox iri marketlərdə məhsulların qiymət etiketlərində “endirim” adı altında alıcılar aldadılır.

Paylaşılan videolarda görünür ki, məhsulun üzərinə “endirimli qiymət” yazılmış yeni etiket yapışdırılır. Amma həmin kağızı qaldıranda məlum olur ki, altında göstərilən məbləğ endirimli yox, əslində məhsulun öz real qiymətidir. Başqa sözlə, əvvəlcə şişirdilmiş qiymət iri hərflərlə yazılır, sonra isə guya endirim olunmuş yeni qiymət təqdim olunur. Vətəndaşlar isə bunu açıq-aşkar aldatma üsulu kimi qiymətləndirirlər.

İstifadəçilər sosial şəbəkələrdə yazırlar ki, belə hiylələr alıcıların etimadını sarsıdır və alış-veriş zamanı insanlarda psixoloji təsir yaradır. Onlar videonun “BazarStore”da çəkildiyini iddi edir və bu marketlər şəbəkəsinin belə oyunlarının tez-tez baş verdiyini qeyd edirlər. Onların fikrincə, “saxta endirim”lər həm rəqabəti pozur, həm də istehlakçıların hüquqlarını kobud şəkildə tapdalayır.

Mütəxəssislər də hesab edir ki, bu cür halların qanunvericiliyə zidd olduğu aydındır. İstehlakçı hüquqlarının qorunması ilə bağlı normalar belə hallara qarşı inzibati məsuliyyət nəzərdə tutur.
Vətəndaşlar isə aidiyyəti dövlət qurumlarını məsələyə diqqət yetirməyə və marketlərdə qiymət siyasətinə daha ciddi nəzarət etməyə çağırırlar.

Fidan