Göygöldə təcili tibbi yardım briqadası təzyiqə məruz qalıb - FOTO

Göygöldə çağırışa gedən təcili tibbi yardım briqadası təzyiqə məruz qalıb, avtomobilə zərər vurulub

Avtosfer.az-ın məlumatına görə, hadisə Göygöl şəhərində Əliağa Şıxlınski küçəsində qeydə alınıb.

Belə ki, çağırışa gedən təcili tibbi yardım briqadası xəstə yaxınları tərəfindən təzyiqə məruz qalıb. Təcili tibbi yardım maşınının pəncərəsi sındırılıb.

İlkin məlumata görə, xəstənin yaxınları təcili tibbi yardım briqadasının gecikdiyini iddia ediblər. Həkim isə çağırışa zamanında gəldiklərini, çağırışdan 6 dəqiqə sonra ünvana çatdıqlarını bildirib.

Hadisə yerinə polis əməkdaşları cəlb olunub.

***

Göygöl Rayon Polis Şöbəsinə rayon ərazisində təcili tibbi yardım avtomobilinə zərər yetirilməsi ilə bağlı məlumat daxil olub:

“Daxil olan məlumat əsasında aparılan ilkin araşdırmalarla müəyyən edilib ki, vəfat edən şəxsin yaxın qohumu olan qadın təcili tibbi yardım avtomobilinə daşla zərər vurub. Hadisənin təfərrüatları araşdırılır, müvafiq hüquqi qiymət verilməsi üçün tədbirlər görülür”.