Hava limanında etiraz aksiyası keçirən ekofəallar saxlanılıblar

Frankfurt hava limanı polisi bu gün səhər uçuş-enmə zolağına daxil olaraq hava limanının fəaliyyətinin təxminən iki saat dayanmasına səbəb olan 8 ekofəalı həbs edib.

Bu barədə EFE agentliyi məlumat yayıb.

Qeyd edək ki, hava limanında ekofəalların etiraz aksiyasına görə bu günə planlaşdırılan 1,4 min reysdən 140 reys ləğv edilib.

***

Almaniyanın Frankfurt hava limanında ekofəalların etiraz aksiyasına görə ən azı 140 reys ləğv edilib. Bu barədə aeroportun mətbuat xidməti məlumat yayıb.

Günün sonuna qədər reyslərdə gecikmələr gözlənilir.

Məlumata görə, “Sonuncu nəsil” hərəkatının ekofəallarının uçuş-enmə zolağına daxil olması səbəbindən Frankfurt hava limanı səhər saatlarında fəaliyyətini dayandırıb.

Bildirilib ki, ekofəallar Almaniya hökumətindən 2030-cu ilə qədər neft, qaz və kömürdən tədricən imtinanı tənzimləyən beynəlxalq sazişin hazırlanmasına və imzalanmasına kömək etməyi istəyib.

Onlar xəbərdarlıq edib ki, digər ölkələrin, o cümlədən Böyük Britaniya, Avstriya, Niderland, İsveçrə, Kanada, ABŞ və Norveçin hava limanlarında oxşar vətəndaş etirazları planlaşdırılıb.

Mənbə: “Report”