Hava limanında patronla saxlanılan şəxs: "Mənə ruzi-bərəkət gətirir..."

Türkiyədən müalicədən qayıdan şəxs pul qabında patron gəzdirdiyi üçün saxlanılıb. 

Avtosfer.az-ın "Qaynarinfo"ya istinadən məlumatına görə, saxlanılan 1966-cı il təvəllüdlü Tovuz rayonu, Əsrik Cırdaxan M.C. adlı şəxs barəsində Cinayət Məcəlləsinin 228.1-ci maddəsi ilə cinayət işi açılıb və işə məhkəmədə baxılıb. 

Məhkəmədə məlum olub ki, M.C. xəstəliyi ilə bağlı Türkiyəyə müalicə almağa gedib və Balıkesir şəhərində yaşayan Ayşe adlı qadının evində qalıb. Həmin qadının evində Glock-42 markalı tapançalarda istifadə olunan patronlar görüb. O, Ayşedən həmin patronların nə olduğunu, nə üçün saxladığını soruşub. Türkiyəli qadın isə ona sözügedən patronların ruzi-bərəkət gətirdiyini deyib. Daha sonra Ayşen patronlardan birinə nəsə dua oxuyaraq ona verib. O, da patronu pul qabının içinə qoyaraq üzərində gəzdirməyə başlayıb.

Təqsirləndirilən şəxs Azərbaycana Naxçıvan vasitəsi ilə dönüb. O, Naxçıvan-Bakı reysi ilə hava limanından keçmək istəyərkən saxlanılıb. 

Məhkəmənin qərarı ilə, M.C.-ya 1 il 28 gün müddətə azadlığın məhdudlaşdırılması cəzası təyin edilib. O, cəza çəkdiyi müddətdə elektron qolbaqda gəzəcək.