Hava limanında uğursuz zarafat onun həbsinə səbəb oldu - FOTO

ABŞ-nin Florida ştatında yaşayan 27 yaşlı Mak Byorn hava limanında etdiyi uğursuz zarafat səbəbindən həbs olunub.

Avtosfer.az xəbər verir ki, bu barədə "LADBible" nəşri məlumat yayıb.

Hadisə Byorn təyyarəyə minməzdən əvvəl, uçuş üçün pilləkənlərdə olarkən baş verib. O, yüksək səslə təhlükəsizlik əməkdaşlarının çantasında olan bombanı görmədiklərini bildirib. Bort bələdçisinin xəbərdarlığına baxmayaraq, Byorn zarafatından imtina etməyib və eyni ifadəni təkrar edib.

Bu davranış onun dərhal saxlanılmasına səbəb olub. Byornun əşyalarına baxış zamanı heç bir partlayıcı vasitə aşkar edilməyib, lakin Florida qanunvericiliyinə əsasən, bomba təhlükəsi ilə bağlı yalan məlumat vermək ikinci dərəcəli cinayət hesab olunur.

Byorn məhkəmədə özünü təqsirli bilmədiyini bildirib.

Məlumata görə, o, ad gününü həbsxana kamerasında, məhkəmənin qərarını gözləyərək keçirib. Əgər təqsir sübuta yetirilərsə, onu uzunmüddətli həbs cəzası gözləyir.(oxu.az)