“Nailiyyətləri saxtadır” - Araz Musayevlə bağlı rəsmi açıqlama

Azərbaycan Kikboksinq Federasiyası özünü 9 qat dünya və Avropa çempionu kimi təqdim edən Araz Musayevlə bağlı açıqlama yayıb.

Avtosfer.az “Qafqazinfo”ya istinadən xəbər verir ki, açıqlamada onun qeyd etdiyi nailiyyətlərin saxta olduğu vurğulanıb:

“Gənclər və İdman Nazirliyinin Kollegiyasının 16 dekabr 2024-cü il tarixli 38 nömrəli Qərarı ilə “Azərbaycan Kikboksinq Federasiyası” İctimai Birliyinin fəaliyyət istiqamətinə muaytay idman növü və onun fənləri əlavə edilərək ölkə ərazisində yayılan idman növləri kimi tanınıb.

Bu qərara əsasən Azərbaycan Kikboksinq Federasiyasının razılığı olmadan ölkə ərazisində, beynəlxalq muaytay idman təşkilatlarının keçirdiyi yarışlarda iştirak edən və bu yarışlarda nailiyyət əldə edən idmançıların nəticələri qeydə alınmayacaq. 

Azərbaycan Kikboksinq Federasiyası bildirir ki, özünü 9 qat dünya və Avropa çempionu kimi qələmə vermiş Araz Musayev Furqan oğlu, Azərbaycan Respublikası Gənclər və İdman Nazirliyinin Kollegiyal qərarına qarşı itaətsizlik edir, federasiyasımıza qarşı əsassız iddialar səsləndirir. Onun iddia etdiyi nəticələr isə həqiqətə uyğun deyil. 

Araz Musayev Furqan oğlunun “WAKO” kikboksinq təşkilatının 2000-ci ildə keçirilmiş Avropa çempionatında əldə etdiyi nailiyyətdən (III yer) başqa bir nailiyyəti yoxdur, digər özünü elan etdiyi titulların həqiqiliyini sübut etmək üçün heç bir mənbədə öz əksini tapmayıb.

Onun əksər qeyd etdiyi nailiyyətlər saxtadır. Hal-hazırda ölkəmizdə müxtəlif idman yarışlarından, idman festivallarından diplom əldə etmiş və özünü saxta dünya və Avropa çempionu kimi təqdim edən onlarla belə idmançı vardır.

Əlavə olaraq bildiririk ki, Musayev Araz Furqan oğlunun iddia etdiyi 9 qat dünya və Avropa çempionu kimi titulları rəsmi sənədlərlə təsdiq olunmadığından həqiqəti əks etdirmir, saxtadır”.