Qatar hücumunun təşkilatçıları saxlanılıb - KİV

Pakistanın Bəlucistan polisinin terrorla mübarizə idarəsi martın 11-də sərnişin qatarına hücumu təşkil etməkdə şübhəli bilinən dörd nəfəri həbs edib.

Avtosfer.az “Report”a istinadən xəbər verir ki, bu barədə “Geo” telekanalı məlumat yayıb.

Qeyd olunub ki, hüquq-mühafizə orqanları digər qurumlarla birlikdə Bəlucistanda törədilən terror aktının təhqiqatını davam etdirir, hücumda iştirak edən şəxslərin müəyyənləşdirilməsi istiqamətində iş aparır. Bildirilib ki, hazırda terror aktını təşkil etməkdə şübhəli bilinən şəxslər saxlanılıb.

Xatırladaq ki, 11 mart tarixində Pakistanın cənub-qərbindəki Bəlucistan əyalətinin Kaççi rayonunda silahlı şəxslər sərnişin qatarına hücum edib, sərnişinləri girov götürüblər. Pakistan təhlükəsizlik qüvvələri terror zamanı qatarda qalmış bütün sərnişinləri xilas ediblər və bildiriblər ki, əməliyyat zamanı 33 terrorçu məhv edilib. Lakin 21 sərnişin terrorçu tərəfindən öldürülüb.