Şəhid ailəsinə qarşı dələduzluq edən şəxsə HÖKM OXUNDU

Astarada şəhid ailəsi dələduzluğa məruz qalıb. Avtosfer.az xəbər verir ki, Siyakü kənd sakini A. övladının xüsusi məktəbdə təhsil almasını istəyib. Əvvəldən tanıdığı Əmrah Abuşov adlı şəxs ona bu işdə yardım edəcəyini bildirib və əlavə edib ki, bunun üçün 5000 manat pul lazımdır. Zərərçəkmiş məsələ barədə ailə üzvləri ilə məsləhətləşib. Əmrah Abuşov bütün ailə tərəfindən tanındığına görə deyilən məbləği nəğd şəkildə ona veriblər. O, bundan sonra sənədləşmə işləri üçün şəhid ailəsindən müxtəlif məbləğlərdə pul istəyib. Ümumilikdə Əmrah Abuşova 10 000 manat pul verilib. Verilən vəd yerinə yetirilmədiyinə görə, şəhid ailəsi Astara Rayon Prokurorluğuna müraciət edib. Əmrah Abuşov saxlanılıb və ona Cinayət Məcəlləsinin 178.2.4-cü maddəsi ilə ittiham elan edilib. Həmçinin məhkəmənin qərarı ilə onun barəsində həbs qətimkan tədbiri seçilib. 

İşin məhkəmə istintaqı Astara Rayon Məhkəməsində hakim İlqar Məmmədovun sədrliyi ilə aparılıb. Məhkəmə zamanı Əmrah Abuşov özünü təqsirli bilmədiyini deyib. Müttəhim qeyd edib ki, şəhid ailəsindən sadəcə borc pul alıb və heç bir vəd verməyib. Həmçinin bəlli olub ki, Əmrah Abuşov dəymiş zərədən 7600 manatı ödəyib. Yerdə qalan 2400 manatın ödənilməsi ilə bağlı da qarşı tərəflə razılaşıb. O, məhkəmədən bütün bunları nəzərə almağı xahiş edib. Hakim İlqar Məmmədovun çıxardığı hökm əsasında Əmrah Abuşova 2 il 6  ay müddətə azadlığın məhdudlaşdırılması cəzası təyin edilib. Həbsdə saxlanıldığı 4 ay ona verilən cəzadan çıxılıb və üzərində qəti olaraq 1 il 10 ay azadlığın məhdudlaşdırılması cəzası saxlanılıb (Qaynarinfo).