Üç min avtomobillə dolu gəmi yanğından sonra Sakit okeanda batdı - VİDEO

Sakit okeanda bir həftə qəzalı vəziyyətdə qaldıqdan sonra batan "Morning Midas"da yanğının başlama səbəbi məlum olub.

Avtosfer.az-ın verdiyi məlumata görə, bu barədə rg.ru xəbər yayıb.

Bildirilib ki, göyərtədə 3 000-dən çox maşın, o cümlədən elektromobil və hibrid avtomobillər olub - məhz onlar yanğının yaranmasına səbəb ola bilərdilər.

Çindən Meksikaya yollanan rolker, həmçinin "Chery Automobile Co." və "Great Wall Motor Co." istehsalı olan avtomobillərlə yüklənibmiş. Göyərtədə "Buick Envision" partiyası da ola bilərdi: gəminin yola düşdüyü Çinin Yantay şəhərində "SAIC-GM" birgə müəssisəsi yerləşir, gəminin fraxteri isə ehtimal ki, "SAIC"in törəmə şirkəti olan "Anji Logistics"dir. "Morning Midas" Meksikaya gedirdi, orada da "Envision" modeli rəsmi olaraq satılır.

Hansı avtomobilin ilk olaraq alışdığı barədə dəqiq məlumat yoxdur. Bununla belə güman edilir ki, yanğın "Great Wall" səbəbindən başlamayıb: daşınan bu model maşınlar arasında elektrifikasiya olunmuş modellər olmayıb, üstəlik onlar başqa göyərtədə yerləşdiriliblər.

Xatırladaq ki, iyunun 5-də Sakit okeanın mərkəzi hissəsində göyərtəsinə təxminən 3 048 avtomobil (onlardan 70-i elektromobil, 681-i hibrid) yüklənmiş gəmidə yanğın olub. Bundan sonra "Morning Midas" Sakit okeanın ortasında ekipaj tərəfindən tərk edilib. Yanğının səbəb olduğu zədələr, əlverişsiz hava şəraiti və sonradan göyərtəyə suyun dolması nəticəsində gəminin vəziyyəti daha da pisləşib və iyunun 23-də (yanğından üç həftə sonra) nəqliyyat vasitələri ilə birlikdə tamamilə batıb.