Bakı-Sumqayıt qatarlarında gediş haqqının kartla ödənişində niyə problem yaranıb? - Açıqlama

Xəbər verdiyimiz kimi, ötən gün Bakı-Sumqayıt-Bakı sürət elektrik qatarlarında gediş haqqının “Mastercard” beynəlxalq ödəniş sisteminə məxsus kartlarla ödənilməsi dayandırılıb. Bu sistemin nə zaman aktivləşdiriləcəyi isə qeyri müəyyən olaraq qalmaqdadır.

Qeyd edək ki, növbəti il üçün ictimai nəqliyyatda rəqəmsal ödənişlərin tətbiq edilməsi ilə bağlı yayılan məlumatdan sonra bu xəbər yeni sistemin icrası ilə bağlı suallar yaradıb.

Maraqlıdır, növbəti ildən etibarən müxtəlif bank kartları ilə ictimai nəqliyyatda ödəniş etmək mümkün olacaqmı?

Məsələ ilə bağlı Sfera.az-a danışan nəqliyyat məsələləri üzrə ekspert Aslan Əsədov bu prosesin icrası üçün təkliflərin verildiyini deyib:

"Bu istiqamət üzrə əvvəlcədən təkliflərimizi vemişik. İctimai nəqliyyatda kartla ödəniş sisteminə keçid zəruridir. Biz öz daxili sistemimizi qurmalı, daha sonra növbəti mərhələlərə keçməliyik. Lakin ictimai nəqliyyatda ödəniş üsullarını fərqli formada da təşkil etmək mümkündür. Məsələn, metro üçün nəzərdə tutulan kartdan digər ictimai nəqliyyat növlərinin hamısında istifadə oluna bilər və s.  “Mastercard”, "Apple Pay" kimi ödəniş üsulunun tətbiqi üçün isə bizdə baza sistemi yoxdur. Bu prosesin icrası üçün ölkədə kadr potensialı var. Sadəcə, bu məsələnin reallaşdırılması üçün hüquqi, fiziki şirkətin, təşkilatın təşəbbüs göstərməsi lazımdır”.

Ekspert sərnişindaşıma qiymətlərinin azala bilməsinin də mümkünlüyünü vurğulayıb:

“O cümlədən, yeni qatarların alınıb istifadəyə verilməsi də müzakirə mövzusu ola bilər. Yeni qatarlar, elektriklə çalışan digər nəqliyyat növlərinin olması sərnişindaşıma qiymətlərinin yarıya düşməsi ilə nəticələnər. Bu özlüyündə xidmət səviyyəsinin də yüksəlməsinə gətirib çıxarar”.