Suraxanıda bir aydır davam edən su PROBLEMİ - Qurumdan AÇIQLAMA

Paytaxtın Suraxanı rayonunun Hövsan qəsəbəsində yerləşən "Bağlıq" adlanan ərazidə sakinlər içməli su problemi ilə üzləşiblər.

Avtosfer.az Oxu.Az-a istinadla xəbər verir ki, bir aya yaxındır evlərə ümumiyyətlə su verilmir.

Məsələ ilə bağlı İri Şəhərlərin Birləşmiş Su Təchizatı Xidmətindən sorğumuza cavab olaraq bildirilib ki, qeyd olunan ünvanda sözügedən quruma məxsus içməli su şəbəkəsi mövcud deyil:

"Ərazidə içməli su xətləri əhali tərəfindən primitiv üsulla çəkilib. Normativ qaydalara əməl olunmadan kiçikdiametrli borulara bir neçə sakinin qoşulması qeydə alınıb. Bu baxımdan hazırda su təminatında çətinliklər yaşanmaqdadır.

Suya tələbatın çox olduğu yay vaxtlarında bu kimi primitiv xətlərdə su təchizatı tam normalara uyğun həyata keçirilə bilmir. Məsələ ilə bağlı Sukanal İdarəsinə də məlumat verilib", - açıqlamada bildirilib.