Binanın girişini zəbt edən sürücü sakinləri çətin vəziyyətə saldı - FOTO

Abşeron rayonu, Xırdalan şəhəri, Heydər Əliyev prospekti 30 ünvanında qayda pozan sürücü qeydə alınıb.

Bu barədə Avtosfer.az-a izləyicilərdən biri “WhatsApp” vasitəsilə fotoşəkillər təqdim edib. Məlumata görə, hadisə mayın 4-də axşam saatlarında “Kristal Abşeron” yaşayış kompleksinin ərazisində baş verib.

Belə ki, 59-BX-520 dövlət nömrə nişanlı “Mercedes” markalı avtomobilin sürücüsü nəqliyyat vasitəsini bina 41-in giriş hissəsində, piyadaların, o cümlədən fiziki məhdudiyyətli şəxslərin hərəkəti üçün nəzərdə tutulmuş sahədə park edərək ərazidən uzaqlaşıb. Nəticədə əlilliyi olan sakinlər üçün ayrılmış keçiddən istifadə mümkünsüzləşib, eyni zamanda digər sakinlərin həyətə daxil olub-çıxması çətinləşib.

Şikayətçinin sözlərinə görə, həmin sürücü avtomobili artıq bir neçə dəfədir eyni qaydada saxlayaraq səhər saatlarınadək giriş hissəsini bloklayır.

Məsələ ilə bağlı qeyd edək ki, yaşayış binalarının girişlərinin, eləcə də əlillər üçün nəzərdə tutulmuş keçidlərin bağlanması inzibati məsuliyyət yaradır və belə hallarda nəqliyyat vasitəsinin məcburi qaydada ərazidən uzaqlaşdırılması da tətbiq oluna bilər.

Nərmin