Bu ərazidə həmişə eyni qayda pozuntusu baş verir - VİDEO

Qaydanı pozaraq sağ istiqamətdən gələn nəqliyyat vasitələrinin yolunu bağladılar, mövcud tıxacın müddətini daha da artırdılar.
Avtosfer.az xəbər verir ki, hadisə paytaxtın mərkəzi küçələrindən birində - Azadlıq prospektində qeydə alınıb. İnsanları qayda pozuntusuna yol verməməyə səsləyən şəxs tərəfindən çəkilən videogörüntüdən aydın olduğu kimi piyada keçidindən önə keçən avtomobillər yolun digər istiqamətində dayanaraq sağdakı maşınların hərəkətini iflic vəziyyətinə salıb. Nəticədə hər iki tərəf dayanaraq uzunmüddətli tıxac yaranmasına səbəb olub. İşin ən acınacaqlı tərəfi isə bu halın hər gün davamlı olaraq bu ərazidə baş verməsidir. Bir sözlə, avtomobillər dəyişsə də, qayda pozuntusu eyni qalır. Qabağa düşmək istəyərkən heç bir nəticə əldə edə bilməyən sürücülərin nəzərinə çatdıraq ki, yolayrıcından sonra bu cür tıxac yarandıqda həmin istiqamətdə işıqforun yaşıl işarəsi yansa belə qarşı tərəfə keçib videoda göründüyü kimi ortada saxlamaları qanuna ziddir. Belə ki, İnzibati Xətalar Məcəlləsinin 75.2 maddəsinə əsasən, mövcud qayda pozuntusu 3 bal, 60 manat cərimə tətbiq edilməklə nəticələnir.

Nərmin Əkbər