Bakıda “KamAZ” ana və uşaqlarını vurdu, azyaşlı öldü - MƏHKƏMƏ

Bakıda yol-nəqliyyat hadisəsində azyaşlı qızın ölümünə səbəb olmaqda təqsirləndirilən Camal Vəliyevin cinayət işi üzrə ibtidai istintaq yekunlaşıb. 

İş yekunlaşaraq baxılması üçün Nizami Rayon Məhkəməsinə göndərilib.

Məhkəmənin hazırlıq iclasının vaxtı fevralın 6-na təyin edilib.

Qeyd edək ki, hadisə ötən ilin dekabrın 22-də paytaxtın Nizami rayonu, Elşən Süleymanov küçəsində qeydə alınıb.

Belə ki, C.Vəliyevin idarə etdiyi “KamAZ” markalı yük avtomobili yol keçmək istəyən 1979-cu il təvəllüdlü Həşimova Yeganə Füzuli qızını və onun övladları - üç yaşlı Həşimova Nazlı Ramin qızı və dörd aylıq Həşimova Alina Ramin qızını vurub.

Hər üç yaralı təcili tibbi yardımın köməyi ilə xəstəxanaya aparılıb. Lakin üç yaşlı N.Həşimova yolda vəfat edib.