Deputat sürücülər üçün bu cərimələrin artırılmasını TƏKLİF ETDİ

Milli Məclisin deputatı Jalə Əhmədova sükan arxasında mobil telefondan istifadə edən sürücülərə qarşı tətbiq olunan cərimə məbləğinin artırılmasını təklif edib.

Avtosfer.az xəbər verir ki, deputat 1 İyun - Uşaqların Beynəlxalq Müdafiəsi Günüylə bağlı Nəqliyyatın İntellektual İdarəetmə Mərkəzində keçirilən tədbirdə çıxışı zamanı bu məsələyə toxunub.

Son zamanlarda sükan arxasında olarkən mobil telefondan istifadə edən sürücülərin sayının artdığını qeyd edən deputat, mövcud əməlin yol-nəqliyyat hadisələrinin baş verməsi, ciddi qayda pozuntularına səbəb olmasını vurğulayıb.

Hal-hazırda qayda pozuntusuyla bağlı tətbiq edilən cərimə məbləği 50 manat müəyyənləşsə də, Jalə Əhmədova bu sahəyə nəzarətin gücləndirilməsini və mövcud məbləğin miqdarının artırılması fikrini irəli sürüb.

Deputat həmçinin 12 yaşına çatmamış uşaqları ön oturacaqda əyləşdirən sürücülərə qarşı cərimə məbləğinin artırılmasını da təklif edib.

Nərmin Əkbər