Fantastik nəqliyyat layihəsi: 25 min yük maşınını əvəz edəcək - FOTO

Yaponiya hökuməti ölkənin iri şəhərlərini gündəlik milyonlarla ton yük daşıyacaq avtomatlaşdırılmış logistika xətlər şəbəkəsi ilə birləşdirməyi planlaşdırır.

Avtosfer.az xarici KİV-ə istinadən xəbər verir ki, “Monster” adlı inqilabi nəqliyyat layihəsi 500 kilometrlik yük konveyerinin yaradılması üçün Yaponiyanın Torpaq, İnfrastruktur, Nəqliyyat və Turizm Nazirliyinin ekspert qrupu tərəfindən hazırlanır. Yeni avtomatlaşdırılmış xətlər şəbəkəsi təxminən 25 min yük maşınını əvəz edə biləcək.  

Tokio və Osaka şəhərləri arasında nəzərdə tutulmuş marşrut üzrə malların daşınması, həmçinin çatdırılma sənayesindəki işçi çatışmazlığı ilə əlaqədar yaxınlaşan logistika böhranının qarşısını alacaq. Eyni zamanda on minlərlə yük maşını yoldan çıxarılaraq istixana qazı emissiyalarını əhəmiyyətli dərəcədə azaldacaq.

Təkcə avtomatlaşdırılmış logistika xətti infrastrukturunun qurulmasının dəyəri təxminən 23 milyard dollara başa gələcək.

Layihənin başlanğıc tarixi 2034-cü ilə qədər müəyyən edilib.

Namiq Musayev