“Halal” sertifikatlı otellər Azərbaycana nə verəcək?

Azərbaycanda bəzi otellərə “Halal” sertifikatının verilməsi həyata keçiriləcək. Bu otellər bir çox müsəlman ölkələrində mövcuddur. Azərbaycanda da bu konseptin yaradılması ölkə turizminə necə təsir edəcək?

Avtosfer.az-ın məlumatına görə, mövzu ilə bağlı danışan turizm eksperti Rəhman Quliyev bildirib ki, Azərbaycanda inşaası nəzərdə tutulan dini otellər halal konspeti ilə çalışacaq:

“Bu otellərin fəaliyyəti regionlarda, eyni zamanda paytaxt ərazisində də nəzərdə tutulub. Ümumiyyətlə, istənilən hər hansı otel də bu konseptə keçə bilər. Bu, Azərbaycana yeni müştəri portfeli yaradacaq. Dünya təcrübəsində də bu konseptlə çalışan otellər var. Xüsusilə ərəb ölkələrində olan bu kimi otellər qardaş Türkiyədə də mövcudur”.

Ekspertin sözlərinə görə, ölkəmizdə fəaliyyət göstərəcək dini otellər Azərbaycana gələn turist sayına təsir edərək əlavə müştəri bazası yaradacaq:

“Hesab edirəm ki, dini konseptdə otellər fəaliyyət göstərsə, yəni halal və alkoqolsuz qidalardan ibarət bufet və ayrı-ayrı hovuzlar mövcud olsa, xüsusi namaz otaqları ayrılsa, Azərbaycana yeni müştəri bazası yaradacaq”.