Taksilərlə bağlı qadağa qiyməti sürətlə bahalaşdırır – YENİ QAYDALAR

Məlum olduğu kimi, ili 15 ildən çox olan taksilərin fəaliyyətinin qadağan olunması ilə bağlı qərar qəbul edilib.

Avtosfer.az xəbər verir ki, taksilərlə bağlı qərar 1 aydan sonra-1 iyulda qüvvə minir. Yeni qərardan sonra paytaxta taksilərin sayının azalması və qiymət artımı müşahidə olunur. Xüsusilə də “1 manatlıq” taksilərin sayında ciddi azalma müşahidə olunur. Artıq qanunsuz taksi fəaliyyəti ilə məşğul olanlarla mübarizə çərçivəsində tədbirlər görülməyə başlanılıb. 

Bəs yeni qaydalar nələrdir? 

Qəbul edilmiş qanuna görə, buraxılış tarixindən 15 ildən artıq müddət keçməyən avtomobil nəqliyyatı vasitələri üçün 3 ay ərzində elektron qaydada müraciət edərək müvafiq icazələri alanlar taksi fəaliyyətlərini davam etdirə bilərlər. Həmçinin taksi minik avtomobilinin daxilində aşağıdakılar olmalıdır: 

- sürücü və daşıyıcı barədə məlumatları əks etdirən məlumat lövhəsi; 
- taksometr (gedişhaqqının tarifləri barədə məlumat lövhəsi ilə birgə) və ya taksometr funksiyalarını yerinə yetirən proqram təminatı olan mobil cihaz; 
- gedişhaqqının nağdsız ödənilməsi üçün POS-terminal. 

Taksi minik avtomobilləri “ABS” əyləc sistemi, salonu normal işıqlandırma sistemi, tam hava tənzimləyicisi (sərinlətmə və isitmə funksiyalı), sürücü və bütün sərnişinlər üçün təhlükəsizlik kəməri ilə təchiz edilməlidir. Beləliklə, hazırda taksi kimi istifadə olunan nəqliyyat vasitələrinə qoyulmuş tələblər qanunvericilikdə bu günə qədər də var idi. Yeni tələb isə taksi minik avtomobilinin bütün salonunu əhatə edən və qeydə aldığı məlumatları ən azı bir ay müddətində saxlaya bilən yaddaş qurğusu ilə təchiz edilmiş videokameraların olmasıdır. 

Xatırlatma üçün qeyd edək ki, 1 iyul 2024-cü il tarixindən sonra buraxılış tarixindən 8 ildən artıq müddət keçmiş avtonəqliyyat vasitələrinə buraxılış kartı verilməyəcək. 

Həmçinin buraxılış kartı almaq üçün taksi minik avtomobilləri ən azı “avro-5” ekoloji standartına uyğun olmalıdır. 

Taksilərin rəngləri ağ və ya qırmızı müəyyən edilib. Taksilərin rənglərinin ağ və ya qırmızı olması ilə bağlı tələb yalnız 2024-cü il iyulun 1-dən sonra sərnişindaşımalarında istifadə olunması üçün ölkə ərazisinə idxal edilən avtonəqliyyat vasitələrinə şamil edilir. 

(cebhe.info)