BMW şirkəti yeni bayraqdar krossoverin adını qeydə alıb

Alman Patent İdarəsinin məlumat bazasında X8 M əmtəə nişanının qeydiyyata alınması üçün verilmiş ərizə aşkar olunub. Sənədlər bu il 23 martın tarixində BMW şirkətinin adından təqdim edilib. Güman edilir ki, bu indeks altında X7 krossoverinin dəbdəbəli və dördyerli lüks versiyası buraxılacaqdır.

Avtosfer.az autograph.az-a istinadən bildirir ki, zahiri cəhətdən, BMW X8 modelinin ondan bir pillə aşağıda dayanacaq X7 krossoverini təkrarlayacağı güman edilir. Üstəlik, insayderlər, yeni modelin X7 krossoverinin kupeşəkilli versiyasının olmadığını bildiriblər. Bununla belə, yeni krossover bir qədər dəyişdirilmiş profilə malik olacaqdır. İki krossover arasındakı əsas fərqlər salonun daha dəbdəbəli tərtibatıdan, zəngin təchizat səviyyəsindən və ikinci cərgədəki fərdi kreslolardan ibarət olacaqdır.

Alman istehsalçısının CO₂ tullantılarının səviyyəsini azaltmaq üçün qəbul etdiyi istiqamət V12 mühərrikini oyundan kənar qoyur. Bu səbəbdən də, yeni X8 modelinin V12 mühərriki ilə təchiz ediləcəyini gözləmək əbəsdir. Hazırda 6,6-litrlik V12 mühərriki M760i sedanında təklif edilsə də, yeni bayraqdar modelinin çıxması ilə bu mühərrik istefaya göndəriləcəkdir.

Bu halda, BMW X8/X8 M üçün uyğun olacaq mühərrik, X7 M50i və X5 M modellərində tətbiq edilən 4,4-litrlik V8 biturbo mühərrikidir. Birincidə bu aqreqat 530 at qüvvəsi, ikincidə isə, 600 və ya 625 at qüvvəsi hasil edir. Bununla belə, bu mühərrik daha böyük potensiala malikdir. Məsələn, Manhart atelyesi onun hasilatını 700 at qüvvəsinə və 900 Nm fırlanma anına qədər artırmağa müvəffəq olub.