BYD Avropada ultra sürətli enerji doldurma şəbəkəsi qurmağı planlaşdırır

Çinini avtomobil istehsalçısı BYD Avropada yeni standartlar müəyyən etməyi və enerji doldurma vaxtını əhəmiyyətli dərəcədə azaltmağı hədəfləyir.

Avtosfer.az xəbər verir ki, BYD-nin direktoru Stella Li verdiyi açıqlamada, Avropada 1000 kilovatdan çox enerji doldurma gücünə malik ultra sürətli şarj stansiyaları şəbəkəsi qurmağı planlaşdırdıqlarını bildirib.

Li, şirkətin önümüzdəki 12 ay ərzində qitədəki tərəfdaşları ilə ultra sürətli elektrikli avtomobil şarj cihazları üçün infrastruktur qurmağı planlaşdırdıqlarını və yerli tərəfdaşlarla, eləcə də rəsmi dilerlərdə şarj nöqtələri ilə danışıqlar apardıqlarını söyləyib. 

Li, BYD-nin Avropadakı satışlarının hər ay təxminən 10 faiz artaraq müsbət irəliləyiş olduğunu bildirib və bu tendensiya davam edərsə, Avropada yeni istehsal obyektlərinə investisiya qoymağa hazır olduqlarını qeyd edib.

Li əlavə edib ki, Avropada satmaq üçün Avropada istehsal edəcəklər.

BYD 2025-ci ilin sonuna kimi Macarıstandakı zavodunda Avropada ilk avtomobilinin istehsalına başlayacaq.

Hazırda şirkətin Belçikada 16 diler mərkəzi var. Brüssel, Antverpen və Gentdəki dilerlər onun rəhbərliyi altındadır. Çin şirkəti bu ilin sonuna qədər ölkədə ən azı 20 diler mərkəzinə sahib olmaq istəyir.

Bundan əlavə, BYD son aylarda elektrik avtomobillərində mühüm texnoloji yeniliklər elan edir.

Martın 18-də şirkət öz “Super e-Platforma” texnologiyasını elan edib ki, bu da elektrik avtomobillərinin demək olar ki, adi bir avtomobilin yanacaqla doldurulması lazım olduğu qədər tez doldurulmasına imkan verir. Yeni Han L modeli ilə aparılan sınaqlarda sürətli doldurma sistemi ilə yeni akkumulyator 5 dəqiqədə 470 kilometr məsafə üçün doldurulub.

Planlaşdırılan “Super e-Platforma”nın hətta köhnə akkumulyatorlarda da şarjı 20-30 faiz sürətləndirəcəyi gözlənilir. (Marja)