Mini avtomobillərin mövcudluq problemi

Avropa şəhərlərində mini avtomobillərə maraq çoxdur. Səbəb ölçülərin kiçik olması, ucuzluq və qənaətdir. Lakin vəziyyət dəyişir. 

Avtosfer.az xəbər verir ki, bu maşınları ucuz etmək üçün avropalı konstruktorlar müəyyən üsullara əl atırlar. Xüsusən də ekoloji tələblər sahəsində. 

Mini avtomobillərin aşağı emissiyalı zonalara girə bilməsi və maya dəyərinin aşağı salınması üçün artıq bütün istehsalçılar bu sinifdə Dizel mühərrikli modelləri konveyerdən çıxarıblar. Yalnız benzin versiya qalıb ki, bu da qənaətcil avropalıları qane etmir. 

Avropalı ekspertlərin qənaətinə görə, mini avtomobillərin mövcuduğunu davam etdirməsi üçün elektrik versiyalarının hazırlanması zərurətdir. Lakin burada da çətinlik var: aşağı sinif avtomobillərdə istehsalçının mənfəəti azdır. Çünki alıcılar kiçik modelə böyük pul xərcləmək istəmirlər. Elektromobil hazırlamaq isə daha baha başa gəlir. 

Bir sözlə, avtomobil istehsalçıları dilemma qarşısındadır: ya münasib qiymətə elektromobil hazırlamaq, ya da A sinfindən olan avtomobilləri birdəfəlik istehsaldan çıxarmaq.
Vüqar