"Prius" taksilərin ləğvi də vəziyyəti dəyişmədi – SIĞORTA ÖDƏNİŞLƏRİ 80%-ə ÇATIR

Azərbaycanda avtonəqliyyat vasitələri sahiblərinin mülki məsuliyyətinin icbari sığortası üzrə zərərlilik göstəricisi (ödəniş-yığım nisbəti) artıb. Avtosfer.az Mərkəzi Bankın hesabatına istinadən xəbər verir ki, bu ilin iki ayı ərzində bu növ sığorta üzrə zərərlilik göstəricisi 79% olub.

Qeyd edək ki, bu dövrdə avtomobillərin icbari sığortası üzrə 25 milyon 70 min manat toplanıb, 19 milyon 830 min manat ödəniş edilib. Bu növ üzrə zərərlilik ötən ilin müvafiq dövrü ilə müqayisədə 11% artıqdır.

Xatırladaq ki, 2024-cü ilin yanvar-fevral aylarında bu göstərici 68% idi. Ümumilikdə bu sığrota növü üzrə 24 milyon 493 min manat sığorta haqqı toplanmış və 16 milyon 830 min manatı ödənişlərə yönəldilmişdi.