Almaniya Azərbaycanlıları Alyansı Bundestaqdakı fraksiyaları Ermənistana güclü təzyiq göstərməyə çağırıb

Almaniya Federativ Respublikasında yaşayan Azərbaycan icması ölkəmizin Qarabağ iqtisadi rayonunda Ermənistan silahlı qüvvələri tərəfindən bir sıra genişmiqyaslı hərbi təxribatlar və terror hücumları törədilməsini hiddətlə pisləyib.

Almaniya Azərbaycanlıları Alyansının adından Almaniya Bundestaqının SPD, SDU və digər müxalif fraksiyalarına (AFD, FDP) ünvanlanan bəyanatda bildirilib ki, Rusiya sülhməramlılarının müvəqqəti nəzarətində olan Xocavənd rayonu ərazisində törədilmiş təxribat və terror nəticəsində Azərbaycanın 2 mülki vətəndaşının və 4 polis əməkdaşının həlak olması xəbəri Azərbaycan əsilli almaniyalıları dərindən narahat edib.

Nəzərə çatdırılıb ki, 2020-ci ildə baş vermiş 44 günlük Vətən müharibəsindən indiyə qədər ümumilikdə mina qurbanlarının sayı 314 nəfərə çatıb, onlardan 67 nəfər həlak olub. Bildirilib ki, Ermənistanın 10 noyabr 2020-ci il tarixli Üçtərəfli Bəyanata və beynəlxalq hüquqa zidd davranışı Azərbaycanın mülki vətəndaşlarının və hərbi qulluqçularının həyatını təhlükə altına atır.

Alyans parlament fransiyalarını bölgədə dayanıqlı sülhün və sabitliyin əldə olunması naminə Ermənistana güclü təzyiqlər göstərməyə və qətiyyətli addımlar atmağa çağırıb.

Qeyd edək ki, Alyansın İdarə heyətinin sədri Nuran Abdullayev bəyanatı qurumun adından göndərib.