Artan yol qəzalarının səbəbləri nədir? - AÇIQLAMA

Son zamanlarda Azərbaycanda yol qəzalarının sayının artığı müşahidə olunur.

Xüsusilə ölümlə nəticələnən ağır yol-nəqliyyat qəzalarının artdığını desək yanılmarıq. Dəhşətli qəzaların böyük əksəriyyəti paytaxt Bakıda yaşansa da, bölgələrdə də analoji hallara rast gəlirik.

Ümumiyyətlə, yol-nəqliyyat qəzalarının baş vermə səbəbi nədir? Bunun qarşısını almaq üçün hansı addımlar atılmalıdır?

Nəqliyyat məsələləri üzrə ekspert Elməddin Muradlı Cebhe.info-ya açıqlamasında bildirib ki, təəssüflər olsun ki, 2022-ci ildə yol-nəqliyyat qəzalarının sayı artıb:

"Ötən il təxminən qəzalarda 120-130 ölüm faktı artıb. Xəsarət alanların sayında da artım var. Prezident İlham Əliyev tərəfindən imzalanmış 2019-2023-cü illəri əhatə edən "Azərbaycan Respublikasında yol hərəkətinin təhlükəsizləyinə dair Dövlət Proqramı"nda yol-nəqliyyat hadisələrinin sayının 30 % azaldılması nəzərdə tutulmuşdu. Amma çox təəssüflə qeyd etmək istəyirəm ki, artım baş verib.

Burada ümumən sürücülərin məsuliyyətsizliyini qeyd etmək lazımdır. Bəzi sürücülər radarların və kameraların yerlərini əzbər bilirlər. Onları keçdikdən sonra yenə sürət həddini aşırlar, təhlükəli manevrlər edirlər və qırmızı işıqda keçirlər. Həmçinin, narkotik vasitələlərin təsiri altında olan sürücülərin sayı da artmaqdadır. Bu da ciddi bir problemdir". 

Ekspert qeyd edib ki, yük avtomobillərinin iştirakı ilə baş verən qəzalarının da sayı artır: "Bu da ciddi narahatlıq doğurur. Düşünürəm ki, yük avtomobillərinin sürücülərinin təkmilləşdirilməsinə ciddi nəzər yetirmək lazımdır. Bununla yanaşı, ölkədə taksi fəaliyyəti təkmilləşdirilməli, qanunsuz sərnişin daşınmanın qarşısı alınmalı və nəzarət mexanizmi gücləndirilməlidir".

Elməddin Muradlının fikrincə, yol polisinin əvvəlki qaydada gizli və aşkar xidməti təşkil edilməlidir: "Radarların və kameraların yeri daimi olmamalıdır. Tez-tez onların yerini dəyişmək lazımdır. Sürücülərimiz artıq radarların yerini yol polisindən daha dəqiq bilirlər. Ona görə də radarı keçəndən sonra qaydaları müxtəlif şəkildə pozurlar.

Təəssüflər olsun ki, yorğun və yuxusuz sürücülərin törətdiyi qəzalar da baş verir. Sükan arxasında mobil telefondan istifadə etdiyinə görə də qəza törədən nə qədər sürücü var. Artıq beynəlxalq təşkilatlar həyəcan təbili çalırlar ki, yaxın 30 ildə ümumi yol-nəqliyyat hadisələrinin 40 faizinin baş vermə səbəbi mobil telefonlar olacaq. Bu da çox ciddi bir siqnaldır. Düşünürəm ki, bu istiqamətdə indidən qabaqlayıcı tədbirlər görülməlidir".