Axtarışda olan Hüseyn Moskvadakı mənzilini sata bilməyib bunu etdi - FOTO

Azərbaycanlı bloqer Hüseyn Həsənov Moskva şəhərindəki mənzilini başqasının adına keçirib. 

Avtosfer.az xəbər verir ki, hazırda beynəlxalq axtarışda olan bloqer əmlak müsadirəsindən yayınmaq üçün sövdələşməni dayandırıb. 

Belə ki, Həsənov Rusiyadakı əmlakını aktiv şəkildə satışa çıxarıb. Əvvəlcə o, "Rolls-Royce Cullinan" markalı avtomobilini sata bilib. Daha sonra "Neva Towers"də 44-cü mərtəbədə 124 kvadratmetr sahəsi olan üç otaqlı mənzilini satışa çıxarıb. Rusiyanı tərk edəndən sonra Həsənov  evini ayda 749 min rubla icarəyə verib, sonra isə 100 milyon rubla (2 128 300 AZN) satışa çıxarıb, lakin uzun müddət alıcı tapa bilməyib.

Məlumata görə, mülkün sahibi mayın 19-da - bloqer axtarışa veriləndən sonra dəyişib. H.Həsənov həbs olunmaması üçün mənzili sadəcə olaraq tanıdığı şəxsin adına keçirib. 

Xatırladaq ki, Rusiyada Həsənov barəsində xüsusilə böyük miqdarda pul vəsaitinin leqallaşdırılması ilə bağlı cinayət işi açılıb. Ona qiyabi həbs qətimkan tədbiri seçilib. Bloqeri 7 ilədək həbs cəzası gözləyir. Rusiya İstintaq Komitəsinin məlumatına görə, Hüseyn Həsənov 2019-2021-ci illərdə 170 milyon rubldan çox (təxminən 3,6 milyon manat) məbləğində vergidən yayınmaqda ittiham olunur.

​​​​​​​