Azərbaycanda pilotsuz uçuş aparatlarının alınması sadələşdirilir

"Pilotsuz uçuş aparatları elə bir texnologiyadır ki, çox kiçik həcmdə böyük təhlükə yarada bilir. Bir neçə santimetr uzunluğunda olan pilotsuz uçuş aparatları var ki, bir çox hallarda şəxsi həyata, bəzən isə milli maraqlara ciddi təhlükə törədə bilirlər”.

Avtosfer.az xəbər verir ki, bunu Milli Məclisin iqtisadi siyasət, sənaye və sahibkarlıq komitəsinin iclasında “Aviasiya haqqında” qanun layihəsinin müzakirəsi zamanı komitə sədri Tahir Mirkişili deyib. 

Deputat bildirib ki, pilotsuz uçuş aparatlarının icazə sistemi kifayət qədər sadələşdiriləcək.

"Hazırda pilotsuz uçan aparatı idxal etdiyiniz zaman 5 dövlət orqanında icazə almaq lazımdır. Bu isə bir çox hallarda prosedurun kifayət qədər uzanmasına gətirib çıxarır. Texnologiyada qaça bilmərik. Onun öyrənilməsi, istifadə edilməsi, yayılması gələcəyimiz üçün vacibdir. Eyni zamanda düşünürük ki, tənzimləməni müəyyən qədər sadələşdirmək lazımdır. Məndə olan məlumata görə, pilotsuz uçan aparatların idxalı zamanı icazələrin alınması sistemi xeyli sadələşdiriləcək, onlayn alətlərdən daha istifadə olunacaq”, - deyə o qeyd edib.