Bakı metrosunda sürüşən ayaqlar

Bakı Metropolitenində sürüşkən daş döşəmələr problemi yenidən təkrarlana bilər. Əvvəl "28 May" stansiyasında yaşanan olaylar indi də "Gənclik" stansiyasında baş verə bilər. 

Avtosfer.az day.az-a istinadən xəbər verir ki, "Gənclik" stansiyasında da yerə mərmər döşəmələr vurulur. Burada da insanlar yeriyərkən sürüşürlər. Bu günlərdə Zaur adlı 25 yaşlı şəxs həmin hissədə sürüşərək yıxılıb. Xoşbəxtlikdən, o, ağır travmalar almayıb. Redaksiyaya məktub yazan oxucu bu yaxınlarda yaşlı qadının da orada sürüşərək yıxıldığını deyir. Qadın kənar şəxslərin yardımı ilə ayağa qalxa bilib. 

Məsələ ilə əlaqədar saytın əməkdaşı "Bakı Metropoliteni" QSC-nin mətbuat katibi Nəsimi Paşayevlə əlaqə saxlayıb. Qurum rəsmisi aşağıdakıları söyləyib:  "Bəli, bilirəm ki, döşəmələr sürüşkəndir, lakin yaxın günlərdə məsələ həll olunacaq. Təmir işləri başa çatdıqdan sonra döşəmələrdəki sürüşməni azaltmaq üçün tədbirlər görüləcək", - o əlavə edib.