Bakıda gül mağazası səkini və avtobus dayanacağını zəbt edib - FOTO

7-ci mikrorayon, Abay Kunanbayev küçəsində bir gül mağazası (“Sənan market”lə üzbəüz) var. Mağazanın qarşısında avtobus dayanacaq məntəqəsi yerləşir. Mağaza həmin yerdə satdığı məhsulları - gül, dibçək, dibçək torpağı və s. səkiyə düzüb piyadanın yolunu daraldır.

“Səkidə iki nəfər yan-yana hərəkət edə bilmir. Hələ səki kifayət etməyib, yolda dayanacağa aid nişanlanma xəttinin üzərində də dibçək, əklil yerləşdirilir” – sakinlər bildirir.

Səkidə piyadaya, dayanacaqda sərnişinə yaradılan bu problemlə bağlı aidiyyəti qurumlara müraciət edildiyi deyilir. Hələ dəyişiklik yoxdur.

Qeyd edək ki, səkilərdə yaranan belə problemlərin əsas səbəbi vaxtilə müxtəlif obyektlərin plansız tikintisinə və ya yerləşdirilməsinə şəraitin yaradılmasıdır. Bu obyektləri köçürmək real deyilsə, o zaman aidiyyəti orqanlar səkilərdə piyadaların, dayanacaqlarda sərnişinlərin və avtobusların hərəkətinə süni əngəlləri birdəfəlik aradan qaldırılmalıdır.

Leyla