“Onlar potensial olaraq ən ciddi qəza törədəndilər...” - Ekspert yol faciələrini yaradanlardan danışdı
Gündəm 7 İyul 2022 15:18 Oxunub 526
“Onlar potensial olaraq ən ciddi qəza törədəndilər...”  - Ekspert yol faciələrini yaradanlardan danışdı

Rəsmi məlumatlara əsasən, iyulun ilk 4 günündə yollarda baş verən qəzalarda 22 nəfər həlak olub. Belə qısa müddətdə bu qədər ağır göstərici isə istər-istərməz suallar yaradır.
Avtosfer.az-ın məlumatına görə, bununla bağlı nəqliyyat məsələləri üzrə ekspert Ərşad Hüseynov deyib ki, səhər saatlarında, hərəkətin pik vaxtı, ciddi sıxlıq və tıxac olan bir yerdə qəza hadisələrinin baş vermə səbəbi sürücülərin telefondan istifadəsidir:

“Həmin vaxt nəqliyyat axını gah gedir, gah da dayanır, orta sürət 10 km/saat-dan az olur. Diqqət etsəniz, hər 5 sürücüdən 4-nün əlində smartfon görəcəksiniz. Sadəlövhcəsinə düşünürlər ki, tıxacdır, sosial şəbəkələrə və ya başqa məlumatlara baxaq, görək nə var-nə yox? Onsuz da ara məsafəsi saxlamırıq, belə asta sürətdə isə az qala bufer-buferə və güzgü-güzgüyə sürürük. Sürücünün gözü isə smartfondadır. Qabaqdakı dayananda onu görmür və beləcə qəza hadisələri baş verir. Düzdür, tıxacda belə hadisə az miqdarda maddi ziyan vurur. Amma xeyli sürücü bunu yüksək sürət vaxtı da edir. Bu halda isə daha faciəli nəticələr olur”.


Ekspert əlavə edib ki, tıxacda bu səbəbdən baş verən hadisələr yolu daha da keçilməz edir:


“Nəticədə həmin tıxac daha dözülməz olur və uzun müddət davam edir. Tıxacdan çıxan sürücü isə ayağını qaza basaraq, çox aqressiv sürür, yolda ağır qəza baş verir. Avtomobil sürərkən smartfona baxan sürücü həm gözlərini kor edir, həm də potensial olaraq ən ciddi qəzaya düşür. Nəzərə almaq lazımdır ki, yollarda etdiyimiz ən xırda səhvlərlə ən ağır faciələr arasında məsafə gözlə qaş arasındakı qədərdir”.

 

ŞƏRH YAZ
Ad

E-mail

Şərh