Maşınla DSX əməkdaşını vuraraq öldürən şəxsə cəza verildi

Ucar Rayon Məhkəməsində qəza törətməkdə təqsirləndirilən Fikrət İslamovun (adı və soyadı şərtidir) cinayət işi üzrə məhkəmə istintaqı yekunlaşıb.

Avtosfer.az xəbər verir ki, hakim Xəyal Bədəlovun sədrliyi ilə keçirilən prosesdə hökm oxunub.

Məhkəmənin hökmü ilə Fikrət İslamov cəzasını məntəqə tipli cəzaçəkmə müəssisəsində çəkməklə 3 il 8 ay müddətə azadlıqdan məhrum edilib.

İttihama görə, hadisə 2024-cü il oktyabrın 5-də, saat 17:39-da Bakı-Qazax yolunun Ucar rayonunun Müsüslü kəndi ərazisindən keçən hissəsində qeydə alınıb.

Belə ki, Fikrət İslamov idarə etdiyi "Daimler Chrysler E200" markalı minik avtomobili ilə hərəkətdə olarkən yolu keçən piyada, Göyçay sakini, 1997-ci il təvəllüdlü Elçin İslamovu vurub. Nəticədə piyada hadisə yerində ölüb

Hadisədən sonra sürücü saxlanılıb və barəsində polisin nəzarəti altına vermə növündə qətimkan tədbiri seçilib.

Zərərçəkmişin hüquqi varisi olan atası məhkəmədə bildirib ki, hazırda Fikrət İslamov tərəfindən dəymiş ziyan tam ödənilib, onunla barışıb, heç bir iddiası, şikayəti və maddi tələbi yoxdur.

Qeyd edək ki, Elçin İslamov Dövlət Sərhəd Xidmətinin müddətdən artıq həqiqi hərbi xidmət hərbi qulluqçusu olub. O, Cəbrayıl rayonunda xidmət edib (pravda.az).