Park edilmiş avtomobildən meyit tapıldı

İstanbulun Küçükçekməcə rayonunda asfaltlama işləri aparan İstanbul Böyükşəhər Bələdiyyəsinə (İBB) bağlı İSTAÇ əməkdaşları park vəziyyətində olan bir avtomobildə hərəkətsiz qalan şəxsi aşkarlayıb.

Avtosfer.az türk mediasına istinadən xəbər verir ki, hadisə İstasyon Caddesi, Halkalı Marmaray dayanacağı yaxınlığında baş verib. Yol kənarında uzun müddətdir park edilmiş avtomobillərin yığışdırılması üçün əraziyə gələn işçilər, maşında sürücü yerində oturan şəxsi oyatmaq istəyiblər. Onu hərəkətsiz halda görən əməkdaşlar dərhal polis və təcili tibbi yardıma məlumat veriblər.

Əraziyə gələn polis əməkdaşları da şəxsi oyatmağı bacarmayıb avtomobilin şüşəsini sındıraraq qapını açıblar. Sağlıq işçilərinin yoxlaması zamanı həmin şəxsin artıq həyatını itirdiyi müəyyən olunub.

Prokurorluq və hadisə yeri müstəntiqlərinin araşdırmalarından sonra meyit otopsi üçün Ədli Tibb Qurumunun morquna göndərilib. Avtomobil isə çəkici vasitəsilə otoparka aparılıb.

Məlumata görə, avtomobil təxminən 10 gündür Marmaray dayanacağı önündə park vəziyyətində imiş. Hadisə ilə bağlı araşdırma davam edir.(Sonxeber.az)