“Bakı Metropoliteni”ndə yeni təyinat olub

“Bakı Metropoliteni” QSC-nin İcraya nəzarət və sənədlərlə iş departamentinə yeni rəis təyin edilib.

QSC-dən Avtosfer.az-a verilən məlumata görə, bu vəzifə Səadət Faiq qızı İsmayılovaya həvalə edilib.

O, “Bakı Metropoliteni”nə bu ilin may ayında gəlib və QSC sədrinin icraçı ofisinin rəis müavini vəzifəsində çalışıb. Ondan öncə, S. İsmayılova, yəni 2018-2025-ci illərdə “Azərbaycan Dəmir Yolları” QSC-də Hüquq idarəsinin aparıcı hüquqşünası, Təchizat departamentinin Hüquqi təminat və sənədlərlə iş şöbəsinin rəisi, eləcə də 2020-ci ildən Cəmiyyətin sədr müavininin məsləhətçisi vəzifələrində işləyib.

Əmək fəaliyyətinə 2005-ci ildə başlayan Səadət İsmayılova Ədliyyə Nazirliyinin Kadrlar idarəsində məsləhətçi, aparıcı məsləhətçi və böyük məsləhətçi vəzifələrində çalışıb, kiçik ədliyyə müşaviri xüsusi rütbəsinə malik olub. O, həmçinin Dövlət İdarəçilik Akademiyasında inzibati idarəetmə üzrə müəllim kimi fəaliyyət göstərib.

Qeyd edək ki, S. İsmayılova 1981-ci ildə anadan olub. O, 1998-2002-ci illərdə Bakı Dövlət Universitetinin Hüquq fakültəsinin bakalavr, 2002-2004-cü illərdə isə magistratura pilləsini bitirib. Beynəlxalq səviyyəli layihə rəhbəri kimi “IPMA Level C - Certified Project Manager” sertifikatına malikdir. 2020-ci ildən Mediasiya Şurasının üzvü, həmçinin Şuranın İxtisas Komissiyasının sədridir.