Bakının başı bəlalı hissəsi - Bu yolda hər gün tıxac olur - FOTO

Hər gün səhər və axşam saatlarında Bakının müəyyən küçə və prospektlərində sıxlıq yaransa da, bəzi yerlər var ki, orada hərəkət tamamilə iflic olur.

Milli.Az bildirir ki, söhbət Binəqədi şosesi ilə Süleyman Sani Axundov küçəsinin kəsişdiyi yerdən gedir. Bakının bu ərazisində hər gün axşam 6-8 arası nəqliyyatın hərəkətində ciddi problemlər yaranır.

Bu sıxlığın əsas səbəbi isə Süleyman Sani Axundov küçəsindən gələn avtomobillərin Azadlıq prospektindən gələn maşınlarının yoluna çıxmalarıdır. Belə ki, hər hansı yol nişanı və işıqfor olmadığından sürücülər bir-birinə yol vermək istəmədiyi üçün sözügedən ərazidə uzun tıxaclar yaranır.

Artıq uzun illərdir ki, sözügedən ərazidə axşam pik vaxtlarda kilometrlərlə sıxlıq yaranır, lakin problemin həlli üçün hər hansı işlər görülmür. Halbuki adi bir "Qadağandır" nişanı və ya işıqforla məsələni həll etmək olar.