Bərdədə "bayraq qalmaqalı" ilə bağlı cinayət işi başlanıb - YENİLƏNİB

Azərbaycanda bayrağa qarşı hörmətsizliklə bağlı hadisənin Bərdədə baş verdiyi müəyyənləşib. 

Avtosfer.az xəbər verir ki, hadisəni törədən şəxsin Bərdə Rayon İcra Hakimiyyətinin nümayəndəsi olduğu bildirilib. 

Məsələ ilə bağlı Bərdə Rayon İcra Hakimiyyəti məlumat yayıb. 

Qeyd edilib ki, qurum sosial şəbəkələrdə yayılmış Azərbaycan Respublikasının Dövlət Bayrağına qarşı aparatın baş məsləhətçisi Zöhrab Zöhrabbəyovun qeyri-etik hərəkətlərindən məlumatlıdır və baş vermiş hadisəyə görə təəssüf hissi keçirir.

Məlumatda bildirilib ki, hadisə ilə əlaqədar Zöhrab Zöhrabbəyovla ətraflı söhbət aparılaraq izahatı alınıb və yol verdiyi ciddi nöqsana görə haqqında inzibati tənbeh tədbiri görülüb:
 
“Birinci Qarabağ müharibəsinin şəhidi, “Azərbaycan Bayrağı” ordenli Sərhəd Zöhrabbəyovun oğlu Zöhrab Zöhrabbəyov yol verdiyi hərəkətinə görə peşmançılıq hissi keçirdiyini bildirib”.

***

Bərdədə "bayraq qalmaqalı" ilə bağlı cinayət işi başlanıb.

Bu barədə Avtosfer.az-a Baş Prokurorluqdan məlumat verilib. Xəbərə görə, qeyd olunan faktla bağlı Bərdə rayon prokurorluğunda Cinayət Məcəlləsinin 324-cü (Azərbaycan Respublikasının Dövlət bayrağı və ya Azərbaycan Respublikasının Dövlət gerbi barədə təhqiredici hərəkətlər) maddəsi ilə cinayət işi başlanaraq istintaqın aparılması Bərdə Rayon Polis Şöbəsinə tapşırılmışdır.