Brayza: “Gəncəyə dəhşətli raket hücumları heç vaxt unudulmayacaq”

“Gəncəyə raket hücumlarının nəticələri müharibədən sonrakı razılaşmaların həyata keçirilməsi üzrə daha fəal işə sövq etməlidir”.

Bunu “Report”a beynəlxalq ekspert, ABŞ Dövlət Katibinin Avropa və Avrasiya məsələləri üzrə keçmiş müavini Metyu Brayza bildirib.

“İki il əvvəl Gəncədə çox sayda günahsız uşaq, qadın və kişinin həyatına son qoyan dəhşətli və qeyri-qanuni hücumlar nəticəsində həlak olanların ailələrinə dərin hüznlə başsağlığı verirəm. Bu cinayət heç vaxt unudulmayacaq. Ümid edirik ki, bu, sülhə can atanları Ermənistan və Azərbaycan arasında müharibədən sonra əldə edilmiş razılaşmaların həyata keçirilməsi üçün daha fəal işləməyə sövq edəcək. Bununla belə, dəhşətli hərəkətlərin bir daha təkrarlanmaması təmin olunacaq”, - o vurğulayıb.

Xatırladaq ki, İkinci Qarabağ müharibəsi zamanı Ermənistan silahlı qüvvələri Gəncə şəhərini ümumilikdə 5 dəfə - 4, 5, 8, 11, 17 oktyabr 2020-ci il tarixlərində raketlərdən və ağır artilleriya qurğularından atəşə tutub. Bu hücumlar nəticəsində 26 nəfər həyatını itirib, 175 nəfər yaralanıb, mülki infrastruktura və nəqliyyat vasitələrinə ciddi ziyan dəyib.

İkinci Qarabağ müharibəsi zamanı Ermənistanın hərbi təcavüzü nəticəsində 12 uşaq və 27 qadın daxil olmaqla, 93 mülki şəxs həyatını itirib, 454 mülki şəxs yaralanıb, ümumilikdə 12 292 yaşayış və qeyri-yaşayış binasına, 288 avtomobilə, 1018 təsərrüfata ziyan dəyib.