Bu hava limanları da qənaətə keçdi

İtaliyanın Milan Linate, Boloniya, Venesiya və Treviso hava limanından uçuşlar üçün 9 aprel 2026-cı il tarixinə qədər yanacaq məhdudiyyətləri tətbiq olunacaq.

Avtosfer.az “Qafqazinfo”ya istinadən xəbər verir ki, məhdudiyyətlər ABŞ və İsrailin İrana qarşı başlatdığı müharibənin yaratdığı enerji böhranının aviasiya sektoruna təsirləri ilə əlaqədar olaraq ortaya çıxıb.

Belə ki, “Air BP Italia” şirkəti bu hava limanlarına təyyarə yanacağı tədarükündə məhdudiyyətlər barədə aviaşirkətlərə NOTAM (Təyyarəçilər üçün Bildiriş) göndərib.

NOTAM-a əsasən, yanacaq təminində təcili yardım təyyarələri, dövlət uçuşları və uçuş müddəti 3 saatdan çox olan səyahətlər prioritet olacaq. Digər uçuşlar isə məhdud cədvələ uyğun olaraq yanacaq təchizatına çıxış əldə edəcək.

Eyni zamanda, Venesiya, Treviso və Verona hava limanlarını idarə edən “Save Group” bildirib ki, onların hava limanlarında yanacaq məhdudiyyətləri əhəmiyyətli səviyyədə deyil və uçuşlara ciddi təsir göstərməyəcək.